മനോഭാവമോ അനുഭവപരിചയമോ? നിയമനത്തിലെ യഥാർത്ഥ വെല്ലുവിളി
By Sarathkumar Kattoor
Management Consultant & Business Trainer
"Hiring kind people with a positive mindset is better than hiring experienced people with a negative attitude. Skills can be taught. Attitude is harder to change."
കഴിഞ്ഞ 15 വർഷങ്ങളായി വിവിധ മേഖലകളിലെ സ്ഥാപനങ്ങളിൽ മാനേജ്മെന്റ് കൺസൾട്ടന്റായി പ്രവർത്തിച്ച അനുഭവത്തിൽ നിന്ന് ഞാൻ മനസ്സിലാക്കിയ ഒരു പ്രധാന സത്യമാണിത്. നൂറുകണക്കിന് നിയമന തീരുമാനങ്ങളും, ടീം വികസന പ്രവർത്തനങ്ങളും, ബിസിനസിന്റെ വളർച്ച പദ്ധതികളും തയ്യാറാക്കാനും അത് നടപ്പിലാക്കാനും അവസരം ലഭിച്ചിട്ടുണ്ട്. അതിൽ പലപ്പോഴും മികച്ച പ്രകടനം കാഴ്ചവെച്ചത് ഏറ്റവും കൂടുതൽ അനുഭവപരിചയമുള്ളവരല്ല, മറിച്ച് പഠിക്കാൻ തയ്യാറുള്ളതും പോസിറ്റീവ് മനോഭാവമുള്ളതും സ്ഥാപനത്തിന്റെ മൂല്യങ്ങളുമായി ചേർന്നുനിൽക്കുന്നതുമായ ആളുകളായിരുന്നു. ഈ അനുഭവങ്ങളാണ് മനോഭാവത്തിന് കഴിവുകളേക്കാളും അനുഭവപരിചയത്തേക്കാളും ദീർഘകാല വിജയത്തിൽ കൂടുതൽ സ്വാധീനമുണ്ടെന്ന് എന്നെ വിശ്വസിപ്പിച്ചത്.
ഇന്ന് പല സ്ഥാപനങ്ങളും ജീവനക്കാരെ തിരഞ്ഞെടുക്കുമ്പോൾ പ്രധാനമായും പരിഗണിക്കുന്നത് അവരുടെ അനുഭവപരിചയം, സാങ്കേതിക കഴിവുകൾ, മുൻ ജോലി നേട്ടങ്ങൾ എന്നിവയാണ്. എന്നാൽ വർഷങ്ങളുടെ അനുഭവത്തിൽ നിന്ന് മനസ്സിലാക്കിയ ഒരു പ്രധാന കാര്യമുണ്ട് — ഒരു വ്യക്തിയുടെ കഴിവുകൾ വികസിപ്പിക്കാം, പക്ഷേ അവരുടെ മനോഭാവം മാറ്റുക അത്ര എളുപ്പമല്ല.
അനുഭവപരിചയം മാത്രം വിജയത്തിന് ഉറപ്പല്ല
ഒരു ജീവനക്കാരന് 10 വർഷത്തെ അനുഭവപരിചയം ഉണ്ടായിരിക്കാം. എന്നാൽ അദ്ദേഹം ടീമിനോട് സഹകരിക്കാത്തവനാണെങ്കിൽ, മാറ്റങ്ങളെ അംഗീകരിക്കാത്തവനാണെങ്കിൽ, എല്ലാത്തിനും നെഗറ്റീവ് സമീപനം സ്വീകരിക്കുന്നവനാണെങ്കിൽ, അദ്ദേഹത്തിന്റെ അനുഭവപരിചയം സ്ഥാപനത്തിന് പ്രതീക്ഷിച്ച മൂല്യം നൽകണമെന്നില്ല.
ചിലപ്പോൾ ഒരാളുടെ നെഗറ്റീവ് മനോഭാവം ഒരു മുഴുവൻ ടീമിന്റെയും ഉത്സാഹത്തെയും ഉൽപ്പാദനക്ഷമതയെയും ബാധിക്കാം.
പോസിറ്റീവ് മനോഭാവത്തിന്റെ ശക്തി
പഠിക്കാൻ തയ്യാറുള്ള, വിനയമുള്ള, ഉത്തരവാദിത്തമുള്ള, മറ്റുള്ളവരെ ബഹുമാനിക്കുന്ന ഒരു വ്യക്തി തുടക്കത്തിൽ കുറച്ച് അനുഭവപരിചയം മാത്രമുള്ളവനായിരിക്കാം. എന്നാൽ ശരിയായ പരിശീലനവും മാർഗനിർദേശവും ലഭിച്ചാൽ അദ്ദേഹം വളരെ വേഗത്തിൽ വളരാൻ കഴിയും.
പോസിറ്റീവ് മനോഭാവമുള്ള ജീവനക്കാർ സാധാരണയായി:-
- പുതിയ കാര്യങ്ങൾ പഠിക്കാൻ താൽപ്പര്യം കാണിക്കുന്നു.
- ടീമിനൊപ്പം പ്രവർത്തിക്കാൻ തയ്യാറാകുന്നു.
- പ്രശ്നങ്ങളിൽ അവസരങ്ങൾ കണ്ടെത്തുന്നു.
- സ്ഥാപനത്തിന്റെ സംസ്കാരത്തെ ശക്തിപ്പെടുത്തുന്നു.
- മറ്റുള്ളവരെയും പ്രചോദിപ്പിക്കുന്നു.
സ്ഥാപന സംസ്കാരം സംരക്ഷിക്കേണ്ടത് എന്തുകൊണ്ട്?
ഒരു സ്ഥാപനത്തിന്റെ യഥാർത്ഥ ശക്തി അതിന്റെ ഉൽപ്പന്നങ്ങളോ സേവനങ്ങളോ മാത്രമല്ല, അതിന്റെ സംസ്കാരവുമാണ്. മികച്ച സംസ്കാരം സൃഷ്ടിക്കാൻ വർഷങ്ങൾ വേണ്ടിവരും. എന്നാൽ തെറ്റായ മനോഭാവമുള്ള കുറച്ച് ആളുകൾക്ക് അത് വളരെ വേഗത്തിൽ തകർക്കാനും കഴിയും.
അതുകൊണ്ടാണ് പല വിജയകരമായ സ്ഥാപനങ്ങളും ഇന്ന് "Hire for Attitude, Train for Skill" എന്ന സമീപനം സ്വീകരിക്കുന്നത്.
നിയമനത്തിൽ ചോദിക്കേണ്ട പ്രധാന ചോദ്യം
ഒരു ജീവനക്കാരനെ വിലയിരുത്തുമ്പോൾ, അദ്ദേഹത്തിന് എന്തെല്ലാം അറിയാം എന്നതിനേക്കാൾ പ്രധാനമാണ്:
- അദ്ദേഹം പഠിക്കാൻ തയ്യാറാണോ?
- അദ്ദേഹം മറ്റുള്ളവരോട് എങ്ങനെ പെരുമാറുന്നു?
- വെല്ലുവിളികളെ എങ്ങനെ സമീപിക്കുന്നു?
- സ്ഥാപനത്തിന്റെ മൂല്യങ്ങളുമായി പൊരുത്തപ്പെടുന്നുണ്ടോ?
ഈ ചോദ്യങ്ങൾക്കുള്ള ഉത്തരങ്ങളാണ് ദീർഘകാല വിജയത്തെ നിർണയിക്കുന്നത്.
കഴിവുകൾ പരിശീലനത്തിലൂടെയും അനുഭവത്തിലൂടെയും വികസിപ്പിക്കാനാകും. എന്നാൽ നല്ല മനോഭാവം, വിനയം, സത്യസന്ധത, സഹകരണ മനസ്സ് എന്നിവ ഒരു വ്യക്തിയുടെ അടിസ്ഥാന സ്വഭാവത്തിന്റെ ഭാഗമാണ്.
അതുകൊണ്ട് അടുത്ത തവണ നിങ്ങൾ ഒരു നിയമന തീരുമാനം എടുക്കുമ്പോൾ, അനുഭവപരിചയത്തോടൊപ്പം മനോഭാവത്തിനും തുല്യമായ പ്രാധാന്യം നൽകുക.
കാരണം, ഒരു സ്ഥാപനത്തെ മുന്നോട്ട് നയിക്കുന്നത് കഴിവുകൾ മാത്രമല്ല; ശരിയായ മനോഭാവമുള്ള ആളുകളാണ്.
